Ostiralean, urriak 28, 18:30etan, Bizkaia Aretoko Baroja entzunaretoan (Abandoibarra etorbidea 3, Bilbo), emakumeak zientzian izan duen eginkizunari buruzko mahai-ingurua egingo da, Hipatia ardatz hartuta, Alejandro Amenabarren "Ágora" filmaren bitartez. Honako hau da azaroaren 11ra arte zabalik egongo den "Astronomia emakume / Con A de astrónomas" erakusketaren baitan antolatu diren ekintza osagarrien azkena.

Mahai inguruan honako hauek hartuko dute parte: Elisa Garrido, UAMeko Antzinaroaren Historia irakaslea eta antzinate klasikoko emakumearen historian aditua, Javier Ordoñez, Zientziaren Historian katedraduna UAMen, fisikaria eta filosofoa eta CREP sarearen koordinatzailea, eta Iratxe Fresneda, UPV/EHUko Ikus-entzunezko Komunikazioa eta Publizitatea saileko irakaslea, zinean aditua eta bere lana zinea eta generoa aztertzera zuzendu duena.

Mahai-inguruan zientzia, generoa eta zinea izango dituzte hizpide, guztia Alejandro Amenabarren "Ágora" (2009) film sarituaren bitartez. Izan ere, Elisa Garridok eta Javier Ordoñezek aholkularitza lana egin dute film horretan.