Fisikaria eta musikaria. Zer unetan egiten dute bat bi disziplinek?

Fisika hurbilketen zientzia da, eta nik musika erabiltzen dut jendearengana hurbiltzeko. Ez bata eta ez bestea ez dira gauza zehatz eta perfektuak. Eta niri ez zaizkit gauza perfektuak gustatzen.

Irakaskuntza utzi duzu. Euskadin rock and rollak ez du inoiz dirurik emanen? Orain ematen al du ba?

Ez. Ken Zazpi proiektu handi bilakatu da, AEBra joan gara azken diskoa grabatzera... eta sentsazio txarra neukan, bi gauza eta biak erdizka egiten ari nintzela. Eta Ken Zazpirekin disfrutatzeko unea zela erabaki nuen.

Zer eta irakaslea izan zara! Idoloa Euskal Herriko gazte askorentzat, eta irakasle txapa durangarrentzat?

Ez dakit. Ikasgelan disziplina behar da, eta ikasleek ondo ulertu dute hori. Baina ilusio gehien egiten zidana, ikasgelan gorabeherak izan arren, ikasle horiek kontzertuetan ni babesten ikustea izan da. Ikasgelatik haratagoko harremana sortzen da, berezia.

Zein modutan lagundu dizu fisikak musikan, eta alderantziz?

Frekuentziak, armoniak... musikako hainbat kontu ulertzen laguntzen dute, nahiz eta beharrezkoa ez izan. Eta jakin-mina asetzen, baita zientziatik haratago ere. Denbora erlatiboa dela, energia ez dela desagertzen... horren inguruan hausnartzen.

Nou Camp. 70.000 lagun, eta zuek taula gainean. Zirarra hori azaldu dezake zientziak?

Ziur aski bai. Emozio handiko uneak izan ziren. Gora begiratzean, barrualde osoan hotzikara batek uzkurtzen ninduen. Kataluniaren eta Euskal Herriaren artean harreman berezia dago, eta energia-transmisio handia izan zen ikusleen eta taldearen artean.

Laugarren diskoa aurkezten diharduzu, Argiak deritzona. Makina bat buelta emango zenizkion argiari fisikari zaren aldetik.

Uhinen artean argiak eta soinuak ditut gustukoen. Argiak, kasunhonetan, desioak, ilusioak indarrak, energiak... hitz batean, itxaropena esan nahi du. Argi horiek musika bidez azaltzen ahalegintzen gara, nahiz eta fisikoki ezinezkoa izan. Fisikak azaltzen ez duena musikarekin azaltzen dut.

Benetan ilargia lapurtzeko gai al da Eñaut? Hala bada, Nobela etxera!

Arazo ugari izango nuke grabitatearen legearekin, esaterako. Baina une honetan ez dakit inorentzat lapurtuko nukeen; niretzat, agian. Oso gustuko dut, magikoa da. Besteentzat izarrak, asko daudelako.

Eta eguzkia?

Argia, indarra, bizitza ematen diguna. Ilargia ere bai, baina ilargia magikoagoa.

Bete gabeko ametsik?

Egunero egiten dut amets, lo eta esna. Oso ameslaria naiz, eta bete ahala amets berriak sortzen ditut. Ametsik handiena, ametsetan jarraitzea.

Etiketak : Fisika

Egileen iruzkinak (1) Komentarioaren hizkuntza Euskara (1), Castellano (0), English (0)

Zure Iruzkina gehitu