| Atala : Zertan bertan Egilea Eneritz Muguruza noiz 2010-05-14 13:20 |
 Ikastetxeetan ere egiten da ikerketa, eta ez nolanahikoa, alajaina! La Anunciata Ikastetxeko 2 ikaslek Pasaiako airearen kutsadura aztertu dute, baita honegatik saria jaso ere!
Leire eta Olatz Iparraguirre Gil ahizpek "I Bioteknologia Lehiaketa: Bioteknologa zaitez" txapelketan 5. saria irabazi dute. Espainia-mailan antolatu da lehiaketa, eta ikasleak Bioteknologiara -XXI. mendeko zientzia-alor garrantzitsuenetakora- gerturatzea du xede.
"Arnasten dugun airearen ezpurutasunak: Pasaiako Badiaren azterketa" lana aurkeztu zuten pasaitarrek lehiaketan. Bertan, "gaur egungo kutsadura atmosferikoaren arazoa, baita airearen poluzio-eragileak, zergatiak, eta ondorioak ere (giza gaixotasunak, eraikuntzen hondatzea, biodibertsitatearen galera, etab.)" aztertu dituzte, Leireren hitzetan.
Beraien lana 10 finalisten artean gelditu zen, eta Madrilen aurkeztu zuten, epaimahai baten aurrean. "Hasieran urduritasuna gailendu zitzaigun, izan ere, eskarmentu eza nabari zitzaigun, baina berehala, epaimahaiak gure azalpenekiko agertutako jakin-mina ikusita erosoago sentitu ginen, eta ez genuen arazorik izan", dio Olatzek.
Egileen iruzkinak (0) 
Komentarioaren hizkuntza Euskara (0), Castellano (0), English (0) |
|
|
