|
Kazetaria ikasketaz eta aktorea profesioz. Eta hara! Kazetariarena egiten duzu orain.
Interpretazioa ere ikasi nuen, aktore-lana egin izan dut, eta orain hau iritsi da. Ez da kazetari baten ohiko lana, aktore-lana ere bada. Horregatik, oso ondo pasatzen dut.
Beltzez janzten den Estik eta Esti kazetariak ba al dute antzik?
Oso ezberdina da. Kazetari-lana baino ez balitz, ez nuke egingo. Nik ez nuke albistegietan lan egingo, baina saio hau oso gustuko dut.
Zergatik aukeratu zenuen ikus-entzunezko komunikazioa ikastea?
Nik aktore izan nahi nuen. Baina gurasoek, badaezpada, zerbait serioa ikasteko esan zidaten eta ikus-entzunezko komunikazioa aukeratu nuen. Nik nahi nuen horretatik gertu zegoelako: zinearen inguruko ikasgai asko genituen, laburmetraiak eta gidoiak egiten genituen...gustuko nuen.
Nor elkarrizketatuko zenuke gustura?
Beharbada Van Gogh, baina hilda dago. Kultura-arloko jendea elkarrizketatuko nuke: Saramago, Klimt margolaria... Politika, aldiz, ez zait interesatzen, ez dut ezertxo ere sinesten.
Eta zergatik antzezle-lana?
UBIn geundela, lagun bat antzerki-ikastaro batean hasi zen. Behin harekin joan nintzen, eta izugarri gustatu zitzaidan. Baina ez zen txikitatik nuen bokazioa.
Zer paper egingo zenuke gustura?
Nire ibilbidea Bernarda Alba antzeztuz amaitzea gustatuko litzaidake.
Non imajinatzen zenuen zure buruan komunikazio-fakultatean gora eta behera zenbiltzanean?
Une hartan, nire helburu bakarra aktore izatea zen. Iruñera iritsi nintzen egunean egin nuen lehen gauza antzerki-taldea aurkitzea izan zen, eta han ematen nuen eguna. Ikasketak alde batera utzi gabe, baina ez nuen pentsatzen kazetaria izango nintzenik.
Ordutik, zer aldatu da Estiren bizitzan?
Hamar urte daramatzat Madrilen bizitzen, imajinatu! Gorabeherekin, baina sei urte daramatzat aktore-lanetan. Fakturak aktore-lanarekin ordaindu ditut. Eta, orain, CQCn, karreran ikasitakoa aplikatzen dut aktore-lanean; izugarria da!
Nola uztartzen dituzu bi lanak?
Kazetaria naiz aurretik egiten dugun ikerketa-lanean, eta aktorea kamera aurrean ipintzean.
CQCn lanean hasteak ospea ekarri dizu, ezagunagoa izatea... ona ala txarra da hori?
Oraingoz, ez da ia zer aldatu. Aldizkarietan ikusi ditut nire argazkiak, baina kalean oraindik ez dit inork ezertxo ere ez esan.
Arrakasta. Zortea ala ondo egindako lanaren ordaina?
Biak izan daitezke. Oso ondo lan egiten duen jendea badago, baina baita talenturik ez duen eta arrakasta handia duen jendea ere.
Egileen iruzkinak (1) 
Komentarioaren hizkuntza Euskara (1), Castellano (0), English (0) |
|
|
